قصائد عن استقلال لبنان 2004، ألقاها أطفال معهد سيد لبنان ـ هاريس بارك.
ـ1ـ
فِي مَرَّه حِكِي تِشْرِينْ
التَّانِي.. وْقَلُّنْ : يا حِلْوِينْ
فِيِّي بِيعَيِّدْ لُبْنَانْ
عِيد اسْتِقْلالُو الْحِرْزَانْ
بْيَومْ التَّانِي وِالْعِشْرِينْ
ـ2ـ
تِشْرِينْ بْيَعْرِفْ حَالُو
شَهْر مْدَلَّلْ.. نِيَّالُو
لُبْنانْ كِلُّو بِيحِبُّو
بْحَيْث مْخَبَّى بِـ قَلْبُو
يَوْم الْـ إِخْد اسْتِقْلالُو
ـ3ـ
نِحْنَا بِـ سَيّدِةْ لُبْنانْ
عَمِّ نْعَيِّدْ فِرْحَانِينْ
وْنِزْرَع بِـ شَهْر تِشْرِينْ
بْيَوْم التَّانِي وِالْعِشْرِينْ
غْنَانِي بْنَيَّاتْ وْصِبْيَانْ
مَكْتُوبْ عْلَيْنَا الْهِجْرَانْ
وْبِالْقَلْب مْصَوَّرْ لُبْنانْ
وْأَرْزَاتْ الرَّبّ وْصِنِّينْ
ـ4ـ
يَلْلاّ يَلْلاَّ يَا أَطْفَالْ
نْعَيِّدْ عِيد الإِسْتِقْلالْ
يَلْلاّ نْغَنِّيلُو غْنَانِي
وْنِكْتُبْ تَارِيخُو بِالْبَالْ
وَاللَّه الشَّعْب اللُّبْنَانِي
أَبْطَالْ
بْتِخْلَقْ أَبْطَالْ
ـ5ـ
لُبْنانْ ما بِيمُوتْ
لُبْنانْ رَحْ بِيضَلّ
شَعْب وْشَجَرْ وِبْيُوتْ
وْبَحْر وْسَهْل مَعْ تَلّ
الْعَاصْمِه بَيْرُوتْ
والأَرْض أَرْض الْكِلّ
ـ6ـ
مُشْ رَحْ نِرْضَى إِلاَّ
ما يْوَفِّقْنا أَللَّـه
وْتِتْحَرَّر بْلادِي
كِلاَّ كِلاَّ كِلاَّ
ـ7ـ
مِينْ بِتْحِبّ..
سَأْلُونِي كِلّ الإِخْوانْ
شِقُّوا الْقَلْب
بِتْلاقُوا أَللَّه الدَّيَّانْ
وْأَرْز الرَّبّ
حَامِينَا.. وْحَامِي لُبْنَانْ
ـ8ـ
عَمْ نِدْرُسْ حَرَكاتَكْ
وِمْنَعْرِف تِخْطيطاتَكْ
لُبْنانْ ما بْيِنْبَاعْ
خَبِّي مِصْرِيَاتَكْ
صْدُورْ شَعْبُو قْلاعْ
ما بْتِنْفَعْ تِفْجِيراتَكْ
وِفْزَاعْ مِنَّا فْزَاعْ
مَا مْنِرْضَى إِلاَّ حْيَاتَكْ
**
